أخبار وطنية الناشطة السياسية منيرة يعقوب تعلق على النّاطقة الرّسميّة بإسم الحكومة وتقول: لا تستهينوا بعقولنا!
بقلم منيرة يعقوب، وحدة من النّساء اللّي ضدّ التّمييز
النّاطقة الرّسميّة بإسم الحكومة قاعدة تفسّر في الأمر وتبرّر في الخطأ بتمرير وحدة من les versions اللّي كانت في مجلس الوزراء!
ماهو يا السيّدة الوزيرة، المصيبة غادي! وجود مقترح أصلا من هذا النّوع!
ما تستهينوش بعقولنا على خاطر أنا شخصيّا مقتنعة أنّ الرّأي السّائد والمتحكِّم في إئتلافكم هو ما جاء في مؤلّفات مشايخكم وضرورة إبقاء النّساء في دور المُنجِبة والمُرضعة ومكانها الطّبيعي هو الدّار(وينجّم أيّ حدّ يشوف موجات "أهميّة" الرّجوع لطرق طبخ وتنظيف وعولة الجدّات) وحتّى كيف فرضت النّساء وجودهنّ في كلّ مكان،تحاول الرّجعيّة ببعض أدواتها الحكوميّة إستغلال وضع الوباء باش يحدّوا من حقوق النّساء وهم يعرفوا حقّ المعرفة أنّ البرلمان هذا لا يمكن أن يحاسب الحكومة على مثل هذه الأوامر...
المسألة ما تتعدّاش أنّو فمّة رجعيّة عارفة آش تعمل وتخطّط وتستعمل في مجموعة يهمّها الحكم بأيّ ثمن والزّوز يعتمدوا على موروث ثقافي ذكوري ما يتعدّاش عقليّة"عاد أبي للدّار من عمل النّهار"والأمّ هاني تطبخ وتخيّط والأطفال يلعبون: الطفل بالطيارة أو الكرهبة أو حتّى المُكحلة والبنت تلعب بالعروسة والزّغديدة...
